Таварыства беларускай мовы імя Ф.Скарыны

Мінск
Беларуская English
Увайсьці або зарэгістравацца
навіны

У офісе ТБМ адбылося адкрыццё курсаў украінскай мовы праз беларускую

У пятніцу, 19 кастрычніка, адбылося адкрыццё курсаў украінскай мовы праз беларускую (сумесна з амбасадай Украіны). На курсы запісалася некалькі дзясяткаў чалавек, а ахвотных яшчэ больш.

У мінулым годзе больш за 2 дзясяткі наведвальнікаў такіх курсаў атрымалі адпаведны дыплом аб паспяховым завяршэнні курсаў, прычым урачыстае ўручэнне адбывалася ва ўкраінскай амбасадзе. Калі маеце жаданне далучыцца да вывучэння мовы нашай суседкі, то пішыце на адрас siadziba@gmail.com, накіруем да выкладчыкаў.

2018.10.19 0

Прайшлі чарговыя заняткі "Гістарычнай школы"

Учора, 16 кастрычніка, прайшла лекцыя і прагляды дакументальных гістарычных стужак з "Гістарычнай школай" на чале з Алегам Трусавым, археолагам, гісторыкам беларускай архітэктуры, кандыдатам гістарычных навук. Тэма сустрэчы "Спадчына Радзівілаў: Мір і Нясвіж", на якой былі паказаныя стужкі гісторыка і доктара гістарычных навук Алеся Краўцэвіча (створаныя для тэлеканала Белсат). Цікава было параўнаць фільмы пра Мірскі і Нясвіжскі замкі, сп. Алег даў разгорнуты каментар да стужак, распавёў многа дадатковага матэрыялу і адказаў на розныя пытанні прысутных.

Наступная сустрэча адбудзецца 23 кастрычніка з 17:45 на тэму "Гістарычны цэнтр Нясвіжа". Адрас: офіс ТБМ (вул. Румянцава, 13). Уваход вольны.

2018.10.17 0

Кіраўніцтва Універсітэта імя Ніла Гілевіча пабывала ў Полацку з расповедам пра будучыню і перспектывы ўніверсітэта

У панядзелак, 15 кастрычніка, рэктарат Універсітэта імя Ніла Гілевіча пабываў у Полацку па просьбе грамадскасці, зацікаўленай даведацца больш пра планы і дзейнасць універсітэта. Сярод кіраўніцтва быў в.а. рэктара Алег Трусаў, першы прарэктар Уладзімір Колас, адказны за фармаванне бібліятэкі Лявон Баршчэўскі і адказны за гаспадарчую частку Яўген Кажарскі. На сустрэчу прыйшло два дзясяткі чалавек, якія не толькі слухалі, але і задавалі пытанні, дзяліліся сваімі думкамі і парадамі.

Сп. Лявон Баршчэўскі распавёў пра тэматыку бібліятэчных выданняў, прычым некаторыя выданні можна было пагартаць і азнаёміцца. Сп. Уладзімір Колас звярнуў увагу на будучыя адукацыйныя накірункі, патлумачыў, чаму менавіта яны былі абраныя. Сп. Алег Трусаў падзяліўся і практычным досведам, распавёў пра тое, наколькі важнай з'яўляецца адукацыя менавіта па-беларуску ці праз беларускую мову, бо ідэя стварэння ўніверсітэта якрах і палягае ў тым, што нацыятворчы працэс непарыўна звязаны з якаснай вышэйшай адукацыяй.

 

2018.10.16 0

Пра Універсітэт імя Ніла Гілевіча даведаліся і ў Лідзе

У суботу, 13 кастрычніка, адбылася паездка кіраўніцтва ТБМ і рэктарата Універсітэта імя Ніла Гілевіча ў Ліду. У Лідскім замку было запланавана правядзенне круглага стала, прысвечанага гісторыі рэстаўрацыі гэтага помніка архітэктуры. У паседжанні бралі ўдзел прадстаўнікі мясцовай улады, моладзь, журналісты мясцовых СМІ, грамадскія актывісты.

Асноўным выступоўцам быў Алег Трусаў, кандыдат гістарычных навук, які ад самага пачатку ўдзельнічаў у раскопках на тэрыторыі замка і найбольш дасведчаны ў гэтай тэме. Яму задавалі шмат пытанняў, што датычыліся археалагічных даследаванняў, знаходак, а таксама легендаў і міфаў адносна “падземных хадоў” з Лідскага замка. Быў паказаны фільм, зняты некалькі гадоў таму кінастудыяй “Беларусьфільм”, прысвечаны адраджэнню гэтага адметнага гістарычнага помніка. З невялікім паведамленнем выступіў мясцовы краязнаўца, пісьменнік Лявон Лаўрэш. Круглы стол быў арганізаваны дырэктарам музея Ганнай Некрашэвіч. Напрыканцы сустрэчы была арганізаваная экскурсія па тэрыторыі замка з аглядам экспазіцыі.  

Падчас паседжання старшыня ТБМ, дэпутат Алена Анісім, в. а. рэктара Алег Трусаў, першы прарэктар Уладзімір Колас, прарэктар па навучальнай і акадэмічнай працы Павел Церашковіч прэзентавалі дзейнасць Універсітэта імя Ніла Гілевіча. У сваіх выступах яны закцэнтавалі ўвагу на адметнасці новастворанай установы адукацыі, распавялі пра сваё бачанне выкладання ў сучаснай вну. У прысутных выклікала зацікаўленасць інфармацыя пра запланаваныя спецыяльнасці, а таксама падрыхтоўчыя курсы, навучанне на якіх ужо пачалося. Старшакласнікі, якія прысутнічалі ў канферэнц-зале замка, запоўнілі прапанаваныя анкеты.

 

2018.10.14 0

Прайшла прэзентацыя новага сайта газеты "Наша слова" nslowa.by

У чацвер, 11 кастрычніка, у офісе ТБМ адбылася прэзентацыя новага сайта газеты "Наша слова" nslowa.by. Рэдактар газеты і сайта Станіслаў Суднік распавёў пра накіраванасць праекта, пра перспектыву пераходу толькі на электроннае выданне ў будучыні, тэматыку і развіццё, фактычна, новага навінавага партала.

Цікава, што і вольную назву сайта таксама было няпроста абраць, выратавала, як распавёў сп. Станіслаў, менавіта напісанне праз w. Сайт напаўняецца штодня і мае шырокі тэматычны партфель. Дарэчы, цяпер "Наша слова" мае ўжо 2 сайты. Першы naszaslowa.by таксама актыўны і напаўняецца, але больш накіраваны менавіта на тую аўдыторыю, якая прывыкла да друкаванага фармата. Новы больш разгалінаваны і тэматычна шырэйшы.

 

2018.10.12 1

Запрашаем на прэзентацыю новага сайта газеты "Наша слова"

Сёння, 11 кастрычніка, у офісе ТБМ (Румянцава, 13) у 17:00 адбудзецца прэзентацыя новага сайта газеты "Наша слова". На прэзентацыі рэдактар газеты Станіслаў Суднік і стваральнік сайта распавядуць пра перспектывы праетка, тэматыку і развіццё электроннага выдання.

Запрашаем, уваход вольны!

2018.10.11 0

Запрашаем на кінапрагляд фільма "Персанаж" з беларускай агучкай (абноўлена дата)

Запрашаем у суботу, 20 кастрычніка, у офіс ТБМ (вул. Румянцава, 13) на прагляд у беларускай агучцы стужкі Марка Форстэра з вельмі незвычайным сюжэтам "Персанаж" (ЗША, 2006) з Эмай Томпсан, Ўілам Фэрэлам, Мэгі Джыленхол, Дастынам Хофманам у галоўных ролях. Пачатак прагляду а 18-й, уваход вольны.

2018.10.11 0

У межах падрыхтоўчых курсаў Універсітэта імя Ніла Гілевіча прайшла сустрэча з Святланай Калінкінай

У панядзелак, 8 кастрычніка, у межах падрыхтоўчых курсаў Універсітэта імя Ніла Гілевіча прайшла сустрэча з вядомай журналісткай Святланай Калінкінай, якая вядзе перадачы на тэлеканале Белсат. На сустрэчы спн. Святлана распавядала пра свой досвед працы беларускамоўнай журналісткай, тлумачыла пра моўную палітыку Белсата і чаму часам руская мова становіцца ў перадачах міжнароднай мовай зносін. Спн. Святлану доўга не адпускалі госці (сярод слухачоў былі навучэнцы курсаў Універсітэта імя Ніла Гілевіча, іх бацькі і ўсе ахвотныя, агулам больш за два дзясяткі чалавек), адбываліся цікавыя дыскусіі і спрэчкі. 

Таксама нагадваем, што набор на асноўныя курсы па прадметах гісторыя Беларусі, матэматыка, фізіка, хімія, беларуская, англійская, нямецкая і польская мовы яшчэ працягваецца, больш інфармацыі тут.

2018.10.08 0

Адбылася сустрэча з Андрэем Дынько ў межах падрыхтоўчых курсаў Універсітэта імя Ніла Гілевіча (здымкі)

У панядзелак, 1 кастрычніка, у межах падрыхтоўчых курсаў Універсітэта імя Ніла Гілевіча прайшла сустрэча з рэдактарам новага часопіса "Наша гісторыя" Андрэем Дынько (галоўны рэдактар тыднёвіка "Наша Ніва", адзін з рэдактараў часопіса "Arche"). На сустрэчы былі прэзентаваныя першыя нумары часопіса "Наша гісторыя", сп. Дынько распавёў пра сваю дзейнасць нямала цікавага і адказаў на пытанні тых, хто завітаўся (сярод слухачоў былі навучэнцы курсаў Універсітэта імя Ніла Гілевіча, іх бацькі і ўсе ахвотныя).

Таксама нагадваем, што набор на асноўныя курсы па прадметах гісторыя Беларусі, матэматыка, фізіка, хімія, беларуская, англійская, нямецкая і польская мовы яшчэ працягваецца, больш інфармацыі тут.

Хутка будзе прэзентаваны абноўлены сайт універсітэта і будуць абвешчаны новыя сустрэчы з вядомымі асобамі ў межах падрыхтоўчых курсаў Універсітэта імя Ніла Гілевіча. Сачыце за навінамі і завітвайце на нашыя мерапрыемствы!

2018.10.03 0

БХД пачынае збор подпісаў у падтрымку законапраекта за бел-чырвона-белы сцяг (абноўлена)

У 1991 г., 19 верасня, бел-чырвона-белы сцяг і герб "Пагоня" набылі статус дзяржаўных сімвалаў Беларусі. У сувязі з гэтым Беларускія хрысціянскія дэмакраты ў гэты дзень пачынаюць збор подпісаў у падтрымку законапраекта, перададзенага ў Палату прадстаўнікоў праз дэпутатаў Ганну Канапацкую і Алену Анісім, за наданне статусу першай дзяржаўнай сімволікі бел-чырвона-беламу сцягу і гербу "Пагоня".

"Бел-чырвона-белы сцяг і герб "Пагоня" - гэта неад'емная частка нашай гісторыі, гэта нацыянальныя сімвалы, якія ўвайшлі ў гісторыю беларускай нацыі як першыя беларускі сцяг і герб, зацверджаныя ў пачатку і канцы ХХ стагоддзя. Мы заклікаем усіх грамадзян Беларусі незалежна ад палітычных арыентацый падтрымаць законапраект. Гэта ганьба, калі за бел-чырвона-белы сцяг міліцыя працягвае затрымліваць людзей. Мы выступаем за тое, каб і бел-чырвона-белы сцяг мог выкарыстоўвацца вольна таксама, як і дзяржаўны сцяг, любым грамадзянінам Рэспублікі Беларусь. Пара спыніць нікому не патрэбнае супрацьстаянне з нагоды нацыянальнай сімволікі. Сёння гэта супрацьстаянне выгадна толькі вонкавым ворагам нашай краіны. Заклікаю беларускія ўлады падтрымаць і прыняць праект закона, а ўсіх неабыякавых грамадзян краіны - паставіць свой подпіс у падтрымку законапраекта", - адзначыў сустаршыня БХД Віталь Рымашэўскі.

Заклікаем таксама беларусаў самастойна далучыцца да збору подпісаў. Спампаваць адпаведны бланк можна тут: blank-Zakon-bchb.pdf [80,04 Kb]

2018.10.01 0